اوڀر سئٽزرلئنڊ جو مشهور شهر ”ڊيووس“، دنيا جي دولتمند حڪومتن ۽ سرمايه دار ڪمپنين جي اجلاسن ۽ گڏجاڻين جي ڪري نهايت مشهور آهي. ان شهر کي 1990ع ۾ ”عالمي معاشي فورم“ (WEF) جي سالياني اجلاس جي حوالي سان سڄي دنيا ۾ شهرت ملي، ڇاڪاڻ جو ان بهاني سان ”وال اسٽريٽ“ جي کرب پتين سميت دنيا جا سمورا سرڪاري ۽ غير سرڪاري سرمايه دار ڪٺا ٿيا ۽ عالمي اقتصادي نظام بابت ڪي غير معمولي فيصلا ڪيائون. هي اصطلاح مشهور سماجي سائنسدان ”سموئيل پي هنٽنگٽن“ پهريون ڀيرو استعمال ڪندي، لکيو ته: ”هي دراصل اهڙن دولتمندن جو حلقو آهي، جيڪو قومي واڳنا ۽ سرحدن ۾ يقين نه رکندي، رياستي حڪومتن کي فقط ورثي ۾ مليل اهڙا منتظم سمجهي ٿو، جنهن جي ذميواري دولتمند حلقي طرفان دنيا ۾ ٿيندڙ سرگرمين لاءِ سهولت فراهم ڪرڻ آهي. 2004ع ۾ لکيل پنهنجي هڪ مضمون ”آمريڪي اشرافيه جي خانگائيت“ (De Nationalization of American Elite) ۾ هن زور ڏيندي چيو ته: ” آمريڪي اشرافيه جو عالمي ڪردار دنيا ۾ موجود دولت مند ٿورائيءَ جي مفادن جو تحفظ ڪرڻ وارو آهي. کيس قومي سڃاڻپ رکندڙ اڪثريتي آباديءَ بابت ڪا ڳڻتي ناهي“”هڊسن انسٽيٽوٽ“ سان لاڳاپيل دانشور John Fonte جو چوڻ آهي ته ”ڊيووس جي دولتمند“ جو بنيادي نظريو نامياري اسڪالر”فرانسس فوڪويا ما“ جي ”آزاد جمهوريت“ بابت ڪيل ڪٿ جو جواب آهي، جنهن ۾ ”فوڪوياما“ دنيا جي اسريل ملڪن جي جمهوريت کي، انساني سماج جي فڪري ارتقا جو عروج ڏيکاريندي، تاريخ جي مسافريءَ جي خاتمي جو اعلان ڪيو هئو